فیلولوگیا علم لری دوکتورو، پروفسسور، AMEAفولکلور اینستوتو «دده قورقود»شعبه سینین مۆدیری

چوخسایلی یازیلی منبع لره، او جمله دن نیظامینین«لیلی و مجنون» مثنویسینده اساسا یالنیز بیرجهته حاقق قازاندیرماق اولار کی، اورتا عصرلرین باشلانغیجیندا ایسلام عربیستانیندا جمعییت محببتین نه اولدوغونو آنلامیردی. لاکین «کیتابی_دده قورقود» اوغوزنامه سینین ارامیزدان اوولکی چاغلاردا یارانان «دوخا قوجا اوغلو دلی دومرول»بویوندا ایلکین عایله مۆناسیبتلرینن محببت اۆزرینده قورولوب موحکم سۆتونلر عمله گئتیردییینین گئنیش تصویری وئریلیر.تانرینین ایشینه قاریشیب «اولۆم ملیی»(سونراکی وریانتلاردا عزراییل شکلینه دۆشمۆشدۆر)ایله قارشی_قارشییا گلن دلی دومرول گوناهینین باغیشلانماسی اۆچۆن اوز جانی عوضینه باشقا جان اوده مک مجبورییتینده قالیر. بویدا آتا_آنانین اوولادینا، ائله جه ده عکسینه، اوولادین آتا_آناسینا سئوگیسینین سونۆکلۆیۆ گوستریر کی، حادیثه لر تۆرکۆن«آتالار کولتو»ندن داها اوول کی دووره عاید دیر. چۆنکی دلی دومرولون والیدینلری اوولادلارینین اولۆمۆ ایله راضیلاشیر، دۆنیانین لذذتینی آلیب سون منزیلین آستاناسینا چاتسالار دا، قورو جانلارینی اونون یاشاماسی یولوندا قییمیرلار. . اوز نووبسینده اوغول دا دوغما آتا_آناسینا لاقیدلیک نۆماییش ائتدیریر_ اوز شیرین جانینا گوره هرایکسینین اولۆمۆنه راضیلاشیر. لاکین ار_آرواد مۆناسیبتینه گلنده عینی موتیولی یونان میفلریندن فرقلنن باشقا منظره ایله راستلاشیریق. دلی دومرولون الی هر شئی دن اۆزۆلندن سونرا عومۆر_گۆن یولداشی ایله ویداعلاشماق، حالاللاشماق اۆچۆن تانریدان موهلت ایسته ییر. ارله آروادین دیالوگوندان آیدینلاشیر کی، گنج عایله سئوگی اساسیندا فورمالاشمیشدیر و خۆصوصیله قادین طرف اۆچۆن ارینین یوخلوغوندان سونرا باشقاسی ایله بیر یاسدیغا باش قویماق اولۆمه برابر دیر. بئله کی، دلی دومرولون: «گوزۆن کیمی سئورسه، سن آنا وارغیل! ایکی اوغلانجیغی اوکسۆز قوماغیل!»_تکلیفینی قادین اۆرک یانغیسی و جیددی اعتیراضلا قارشیلاییر، اونونلا بیرلیکده اولمه یی دیگر کیشی ایله اوپۆشمکدن، جینسی علاقه یه گیرمکدن اۆستۆن توتاراق بیلدیریر: «...بیر یاستیقدا باش قویوب امیشدیگیم، قارشۆ یاتان قارا تاغلاری سندن سونرا من نئیلرم؟»

Keywords:

مجنون , دلی دومرول , جان عوضینه جان وئرمه موتیوی , عزراییل , داستان , مثنوی , عشق , حایات , اولۆم.